На днях на пляцоўцы Музея Беларускага Палесся адкрылася выстава «Праекты ў асобах». На ёй экспануюцца 27 распрацовак, якія рэалізаваны ў Беларусі з дапамогай Еўрапейскага Саюза. Яны закранаюць важныя экалагічныя, эканамічныя і сацыяльныя тэмы. Гэта ахова навакольнага асяроддзя, рацыянальнае выкарыстанне прыродных рэсурсаў, укараненне энергазберагальных тэхналогій, развіццё сельскіх тэрыторый і падтрымка прадпрымальніцтва, дапамога падапечным Беларускага дзіцячага хоспіса і жанчынам, якія пацярпелі ад хатняга гвалту, пытанні па еўрапейскім падыходзе ў адукацыі і навуцы, захаванне гістарычных і культурных традыцый.
На выставе прадстаўлены фотаработы Юліі Мацкевіч, якая здзейсніла падарожжа працягласцю больш за 3000 кіламетраў, каб сфатаграфаваць усіх сваіх герояў. Фотаработы экспануюцца на двухбаковых стэндах, дзе з аднаго боку паказаны герой праекта і яго гісторыя, а з другога — інфаграфіка, на якой змешчаны звесткі аб праектах. Фотовыстава зараз падарожнічае па Беларусі.
Начальнік аддзела ідэалагічнай работы, культуры і па справах моладзі гарвыканкама Валянціна Кулак выказала падзяку арганізатарам за тое, што яны абралі менавіта Пінск для правядзення выставы. Сярод аўтараў праектаў, на жаль, не было нашых землякоў.
–— Пінчане не праяўляюць належнай актыўнасці ў праектах Еўрасаюза, — адзначыла В.М.Кулак. — Але я ўпэўнена, што ў будучым яны, аднак, пастараюцца распрацаваць патрэбныя і цікавыя праекты, у якіх змогуць праявіць свае веды.
Галоўная мэта выставы — давесці да мясцовых жыхароў ідэю аб тым, што калі ў каго ёсць пэўныя думкі, якія хацелася б ажыццявіць, то конкурсы і супрацоўніцтва з Еўрасаюзам — гэта выдатнае рашэнне задуманага.
«Праекты ў асобах» шмат падарожнічаюць па Беларусі. У тых гарадах, дзе прайшла выстава, праекты атрымалі водгукі ад жыхароў і мясцовай улады. Менавіта таму арганізатары лічаць, што важна расказаць пра гэтыя праекты і ў Пінску.
Галіна Верамейчык
У адкрыцці выставы прынялі ўдзел каардынатары з Мінска: Галіна Верамейчык (з праектамі «Адукацыя адчыняе дзверы» і «Жывая гісторыя майго краю»), а таксама Дзмітрый Буронкін (з праектам «Прасоўванне энергазберагальных тэхналогій і аднаўляльных крыніц энергіі на мясцовым узроўні»). Быў на адкрыцці і прадстаўнік Столінскага раёна Віктар Велясніцкі (на фота знізу), які прадстаўляў праект свайго земляка «Агародніцкая сетка па эксперыментаванні, абмену і распаўсюджванні інфармацыі».
Вось што паведаміў дырэктар фонда «Цэнтр падтрымкі сельскага развіцця і прадпрымальніцтва Столінскага раёна»:
— Людзі прапануюць свае ідэі, а мы, калі гэта магчыма ажыццявіць, працуем з імі. Напрыклад, у вёсцы Велямічы была ўкаранёна тэхналогія вырошчвання брокалі. А ў Альшанах, Мачулі і тых жа Велямічах пачалі выкарыстоўваць металакаркасныя цяпліцы замест драўляных.
Такія ж ці падобныя праекты, можна сцвяржаць, пад сілу і пінскім своеасаблівым рацыяналізатарам, якіх падтрымлівае Еўрасаюз.
Ірына ДЗЕНІСОВІЧ.
Фота Ганны ВЯРЭНІЧ