Дарагія браты і сёстры ў Хрысце! Шаноўныя суайчыннікі!
З нагоды Божага Нараджэння звяртаюся да вас з найлепшымі святочнымі віншаваннямі. Калядны час натхняе ўсіх нас да паглыблення веры, надзеі і любові. Сярод разнастайных завіраванняў гісторыі і свету Сын Божы ўваходзіць у наша жыццё і ціха стукаецца ў дзверы кожнага сэрца, запрашаючы адкрыцца на дар Божай любові.
Няхай святло Бэтлеемскай зоркі прынясе ў кожны дом Божае бласлаўленне, супакой і ўзаемаразуменне. Няхай нованароджаны Сын Божы абудзіць у нас усё найлепшае і дапаможа з новай моцай адкрыць тое, што з’яўляецца найважнейшым.
Жадаю вам моцнага духоўнага і фізічнага здароўя, усіх неабходных Божых дароў і ласкаў. Няхай цяпло і надзея, якія асвяцілі ноч Хрыстовага Нараджэння, дапамогуць па-новаму адчуць, як моцна мы любімыя і як жа наша любоў неабходна кожнаму чалавеку, якога Бог ставіць на шляху нашага жыцця.
Няхай нованароджанае Божае Дзіцятка прынясе паўнату Божага бласлаўлення і радасці жыцця.
Хрыстус нарадзіўся! Славім Яго!
Антоні ДЗЯМ’ЯНКА,
біскуп Пінскі.