Набліжаецца дзень святкавання 920-й гадавіны першага ўпамінання Пінска ў летапісе. Да свята горада распрацаваны спецыяльны лагатып. Зараз многія прадпрыемствы выпускаюць сваю прадукцыю з гэтым лагатыпам. Не засталася ў баку і Пінская рэгіянальная друкарня. Тут вырашылі выпусціць сшыткі з сімволікай горада-юбіляра. На вокладках размешчаны гістарычныя віды горада, а таксама скульптура палешука з вяслом. Агульны тыраж гэтых сшыткаў пяць тясыч экземпляраў. Хутка іх можна набыць у краме канцылярскіх тавараў «Полиграф» (вул.Леніна, 42).
Акрамя таго, друкары падрыхтавалі ў падарунак і сувенірныя папяровыя пакеты розных памераў са знаёмымі гарадскімі здымкамі горада. Таксама ў «Полиграфе» прадаюцца і сцяжкі з гербам Пінска і лагатыпам.
Друкарня ўвесь час выпускае прадукцыю з відарысамі горада, якую можна набыць у любы час. А ўжо менавіта да юбілею выпускае яе і з лагатыпам да 920-годдзя Пінска.
Пры жаданні заўсёды можна набыць блакноты, магніты, плакаты з выявамі нашага старажытнага города над Пінай, наборы паштовак. Сярод такіх набораў калекцыі «Пинск вчера и сегодня», у якіх выкарыстаны фотаздымкі П.Куніцкага, «Пинск исторический» са здымкамі з фондаў Музея Беларускага Палесся, «Архітэктурныя дыяманты старажытнага Пінска» — з фотаздымкамі С.Гарынца.
Плануецца выпусціць таксама бірулькі, магніты з блакнотам для запісаў і з тэрмометрам. На магнітах знаёмыя пінчукам адлюстраванні горада-юбіляра.
Да таго ж зараз распрацоўваецца макет плакатаў з юбілейнай сімволікай для ўпрыгажэння вітрын магазінаў.
Ірына Дзенісовіч
Фота Ганны Вярэніч