Каманда «Пінскага весніка» шчыра віншуе шаноўных, адданых мясцоваму перыядычнаму выданню на працягу многіх гадоў чытачоў і тых, хто нядаўна далучыўся, з Новым годам і Калядамі!
Мы сустракаем 2024 год і ўспамінаем, якім быў 2023-і. З дапамогай газеты зрабіць гэта вельмі проста, бо ўсе значныя і вартыя вашай увагі падзеі, несумненна, знайшлі сваё адлюстраванне на яе старонках. Рэдакцыя за гэты перыяд выпусціла больш за 50 нумароў штотыднёвіка, у якім тысячы навінаў, больш за 500 артыкулаў, паўсотні фотарэпартажаў. Карыстальнікі сацыяльных сетак пакінулі на сайце і іншых віртуальных пляцоўках мноства каментарыяў і цікавых зваротаў, на якія мы ў поўнай меры адрэагавалі і на 100 працэнтаў адпрацавалі нават самую складаную і часам нязручную тэматыку.
Вы, напэўна, ужо заўважылі на старонках «ПВ» новыя тэмы. Так, у мінулым годзе ў нас стартавалі адразу тры прынцыпова розныя, не падобныя адзін да другога праекты: «Трагедыі вёсак Піншчыны ў гады Вялікай Айчыннай вайны», «Пінскія таямніцы» і «ЗА Беларусь: за духоўнасць і дабрабыт!». Пасля выхаду матэрыялаў акрэсленых напрамкаў у рэдакцыю паступала нямала тэлефонных званкоў, лістоў, зваротаў… Дзякуй вам за гэта, дарагія нашы чытачы, за водгук, за словы падзякі. Мы будзем працягваць і ў новым годзе пачатую справу, больш таго – будзем ствараць новыя праекты. Якія? Няхай гэта будзе для вас невялікім сюрпрызам, аднак вельмі спадзяюся, што яны знойдуць сваіх прыхільнікаў.
Вельмі люблю зімовыя святы яшчэ і за тое, што надыход новага году – гэта своеасаблівая нагода пераасэнсаваць падзеі мінулыя, зрабіць вывады, каб не паўтараць дапушчаных памылак. Сярод праблем, якія найчасцей хвалявалі пінчукоў, – якасць пітнай вады, дарог, адсутнасць парковачных месцаў каля некаторых устаноў аховы здароўя, дэфіцыт талончыкаў на прыём да вузкіх спецыялістаў медыцынскай сферы, несанкцыянаваныя сметнікі і неўладкаваныя, закінутыя пусткі. З надыходам зімы актуалізаваліся да ўсяго і пытанні не расчышчаных ад снегу вуліц і двароў. Але разам з тым трэба адзначыць, што нават палітычна не ангажаваны пінчук заўважыць значныя змены, якія сустракаюцца ўжо на пад’ездзе да горада. Можна не толькі ўбачыць крэатыўныя клумбы, малыя архітэктурныя формы, прыгожыя фасады пабудаваных сучасных і камфартабельных шматпавярховак, адрамантаваных будынкаў, а і, нават не верыцца, ацаніць зручнасць адноўленых дарог, праблемы з якімі на працягу доўгага часу не сыходзілі з крытычных палос выдання. Клопатаў, канешне, яшчэ, як кажуць, два вазы і цэбар, аднак тое супрацоўніцтва і жаданне растлумачыць сітуацыю, паведаміць пра яе сыход, якія былі прадэманстраваны камандамі гар- і райвыканкамаў, усяляюць ва ўсіх нас веру, што праблемы звычайнага чалавека і надалей будуць хваляваць і знаходзіць сваё вырашэнне з боку мясцовай улады. А мы абавязкова дапаможам. Карыстайцеся распрацаванымі спецыяльна для вас тэхналогіямі, адпраўляйце свае навіны, гісторыі або надзённыя пытанні ў чат-бот.
Азіраючыся назад, не магу не сказаць аб яшчэ адной важнай падзеі… Прабачце, што напомню пра новы дзень нараджэння нашага перыядычнага выдання: 1 студзеня 2024-га нам споўніўся роўна адзін год. Узрост вельмі неадназначны: з аднаго боку, мы толькі, будзем спадзявацца, у пачатку доўгага творчага шляху, з другога – за спіной засталося ўжо нямала. Хачу ад усяго сэрца падзякаваць усім вам, шаноўныя чытачы, што падтрымліваеце нас, давяраеце нам свае перажыванні і клопаты. Абяцаем, што і надалей будзем імкнуцца аб’ектыўна і праўдзіва пісаць пра тое, што адбываецца ў рэгіёне.
Дарагія чытачы «ПВ»! Віншуем вас з Новым годам і Калядамі! Няхай 2024-ы будзе шчаслівым для ўсіх нас: і для рэдакцыі, і для партнёраў, і для чытачоў. Няхай знаходзіцца час не толькі для плённай працы, але і для якаснага адпачынку, цікавых і незабыўных сустрэч, пазітыўных і яскравых эмоцый. Поспехаў вам, моцнага здароўя і цудоўнага настрою!
Ганна КАЛОДЗІЧ, галоўны рэдактар «ПВ».