Сустрэча пад назвай “Жывуць успаміны над берагам Піны…” прайшла ў народным літаратурна-краязнаўчым музеі Якуба Коласа ў Пінкавічах.
Нагода самая што ні на ёсць важная і прыемная – 120 гадоў назад народны паэт Беларусі, тады яшчэ Канстанцін Міхайлавіч Міцкевіч, прыехаў у гэтую палескую вёску на беразе Піны настаўнікам. Адбылося гэта ў верасні 1904га. І заставаўся ён тут да студзеня 1906-га.
На сустрэчу прыехалі ўнучка Якуба Коласа, малодшая дачка сына Данілы Вера Данілаўна Міцкевіч і яе дачка Валянціна з сынам Даніілам, а таксама праўнучка Васіліна Валер’еўна Міцкевіч, унучка Міхася, малодшага сына Якуба Коласа, і дачка Марыі Міхайлаўны Міцкевіч, якая не раз наведвала музей у Пінкавічах.
Родных Якуба Коласа гасцінна віталі вучні Пінкавіцкай сярэдняй школы – юныя экскурсаводы, удзельнікі аб’яднання па інтарэсах “ГіД” (гаваркія і дапытлівыя) раённага цэнтра творчасці дзяцей і моладзі. Музычны падарунак падрыхтавалі артысты народнага фальклорна-этнаграфічнага калектыву «Крынiцы».
Вера Данілаўна – даследчыца творчасці Якуба Коласа. Яна падзялілася цікавымі звесткамі пра свайго дзеда. Калі яна нарадзілася, Канстанцін Міхайлавіч ужо памёр. Але пра яго ведае з вуснаў свайго бацькі Данілы, які, дарэчы, нарадзіўся ў Пінску ў хаце на вуліцы Івана Чуклая, якая раней называлася Вадаправодная. Між іншым, у будынку, дзе нават не рабілі перапланіроўку, да гэтага часу жывуць родныя яго першых гаспадароў – чыгуначнага фельчара Арсенія Балевіча.
Васіліна – галоўны захавальнік фондаў дзяржаўнага літаратурна-мемарыяльнага музея Якуба Коласа ў Мінску. Яна расказала, што прадзед называў сябе “міністрам грыбной гаспадаркі”, бо быў заядлым грыбніком. Таму яна прывезла з сабой гульню “Я – міністр грыбной гаспадаркі”. Вучні Пінкавіцкай школы імя Якуба Коласа разам з Васілінай Валер’еўнай згулялі ў яе, а дожджык толькі паспрыяў працэсу, таму што грыбы як раз і растуць у гэтую пару.
– Прыезд родных Коласа – заўсёды свята, якое праходзіць у душэўнай, нават духоўнай атмасферы, таму што сам паэт быў чалавек надзвычай добры і душэўны, – адзначыла кіраўнік народнага літаратурна-краязнаўчага музея Якуба Коласа Жанна Верыч.
Іна УРБАНОВІЧ.
Фота аўтара.