У гарадской дзіцячай бібліятэцы імя Я.Коласа склалася традыцыя – праводзіць пінскія «каласавіны». У апошні час яны атрымалі навуковы характар і знайшлі сваіх пастаянных удзельнікаў. Да нас зноў прыехалі даследчыкі спадчыны Коласа з Мінска, Лунінца, каб разам з музейнымі работнікамі, краязнаўцамі, настаўнікамі і выкладчыкамі, рупліўцамі роднай мовы дакрануцца да невычэрпных крыніц творчасці дзеяча беларускай літаратуры, пагартаць старонкі яго жыцця, у тым ліку звязаныя з Пінскам.
Сёлета ІІІ Міжрэгіянальная навукова-практычная канферэнцыя атрымала назву «Коласаўскія адрасы радзімы: памятныя месцы, музеі, помнікі».
Сярод гасцей – дырэктар Дзяржаўнага літаратурна-мемарыяльнага музея Якуба Коласа ў Мінску Ірына Мацяс. Удзел у канференцыі прынялі члены клуба літаратараў Піншчыны «Пінчукі», пераможцы конкурсу «Мой Пінск. Мой дом. Мае вытокі».
Прысутных шчыра вітала дырэктар гарадской цэнтралізаванай бібліятэчнай сістэмы Дзіна Лагодзіч.
Асаблівую лірычную атмасферу стварыла паэтычна-музычная кампазіцыя ў выкананні народнага эксперыментальнага тэатра-студыі «Пілігрым» каледжа мастацтваў. Не забыць коласаўскія словы: «Мой родны кут, як ты мне мілы!»
Вячаслаў ІЛЬЯНКОЎ.
Фота аўтара.