Я – Уваскрэсенне і Жыццё. Хто верыць у Мяне, будзе жыць.
(Ян 11,25).
Умілаваныя ў Хрысце браты і сёстры!
Пасля перыяду велікапостнага сузірання таямніцы Хрыстовага Крыжа мы ўваходзім у перажыванне найважнейшых падзей у гісторыі нашага збаўлення: перамогі Хрыста над грахом, смерцю і моцамі цемры. Пасля драмы Вялікай пятніцы надыходзіць дзень Уваскрэсення Божага Сына. Жыццё перамагае смерць. Праслаўляем Езуса Укрыжаванага і Змёртвыхпаўсталага. З верай і надзеяй спяваем радаснае «Аллелюя!».
У гэтыя велікодныя дні Касцёл нагадвае нам словы святога апостала Паўла: «Калі вы разам з Хрыстом паўсталі з мёртвых, шукайце таго, хто ў вышынях, не таго, хто на зямлі» (1 Кал 3, 1-2). Уваскрэсенне нашага Пана адкрывае перад намі перспектывы вечнага жыцця. Пойдзем жа гэтым шляхам пасхальнай веры, якая вядзе нас да Дому Айца. Будзем сведкамі праўды пра Уваскрэсенне і перамогу жыцця. Занясём гэтае пасланне, пацверджанае словам і дзеяннем, асабліва тым, хто ахінуты змрокамі цярпенняў і пакутаў у нашыя часы. Толькі Хрыстус можа прынесці сапраўднае жыццё і перамогу над кожнай цемрай гэтага свету.
Няхай радасны вокліч «Аллелюя!» загучыць у гэтыя пасхальныя дні ў нашых дамах з асаблівай моцай. Няхай перажыванне таямніцы Уваскрэсення Езуса Хрыста напоўніць нашыя сэрцы глыбокім супакоем і ўпэўненасцю ў заўтрашнім дні. Няхай Змёртвыхпаўсталы Пан вызваліць нас ад усялякіх клопатаў, цяжкасцяў і неспакояў. А Яго пасхальнае бласлаўленне няхай пераменіць нашае жыццё і пакажа адпаведны напрамак далейшага шляху ў супакоі і сапраўднай радасці.
Хрыстус Уваскрос! Сапраўды Уваскрос! Аллелюя!
Антоні ДЗЯМ’ЯНКА, біскуп Пінскі.
Пінск, Вялікдзень, 2022 г.