Народны каляндар. У кастрычніку з сонцам разлічыся, бліжэй да печы падбярыся
24 кастрычніка
У гэты дзень адвозілі на млын збожжа, каб намалоць з яго муку або крупу.
Ноччу назіралі за зоркамі і спрабавалі прадказаць з іх дапамогай надвор’е і ўраджай: міргаюць – да змены надвор’я, палаюць – да вятроў і сухога году. Шмат яркіх зорак на небе – да ўраджаю наступнага году.
25 кастрычніка
«Марцін святы – губіцель гагаты». Рэзалі гусей і гатавалі з іх розныя стравы.
Прыкметы: яркія зоры на начным небе – пацяплее, цьмяныя – будзе халадаць.
26 кастрычніка
Рыхтавалі месцы для вясновых пасадак. Ладзілі лазневы дзень, каб пазбавіцца ад хвароб і ўмацаваць здароўе.
Лічылі: певень заспяваў раней за дзявятую гадзіну вечара – заўтра будзе дождж.
27 кастрычніка
Гэты дзень людзі называлі Параскева Гразнуха або Параскева Трапальніца. Казалі так: «На Гразнуху не бывае суха», бо прыкмецілі, што гэты дзень адзначаўся няўстойлівым надвор’ем, брудам і халепай.
Заўважылі: калі на дарогах шмат бруду, то роўна праз чатыры тыдні стукнуць сапраўдныя маразы; калі на рабіне мноства ягад, то лістапад будзе вельмі мокры.
28 кастрычніка
Працягвалі мяць і церабіць лён. А вось шыць і праць нельга было – гэта магло прывесці да няшчасця.
Былі такія прыкметы: калі раптам выпадзе снег, то налета будзе вельмі добры ўраджай зерня; калі котка п’е шмат вады, то надвор’е ў бліжэйшы час стане горшым.
29 кастрычніка
Даставалі зімовую вопратку з куфраў, каб прагрэць яе на апошнім сонцы і выветрыць на першым марозе. Верылі, што гэта дапаможа прадухіліць хваробы.
Пераменлівы вецер у гэты дзень прадказваў зіму з частымі адлігамі.
30 кастрычніка
Прыбіралі з двароў калёсы, пераходзілі на санкі, што азначала канец летняга шляху.
Лічылі: калі месяц на небе з белым адлівам, то будзе пахаладанне, калі з жоўтым – сонечнае надвор’е; калі котка спіць цэлы дзень, то хутка пацяплее.
Падрыхтавала Алена Брыч
Фота з адкрытых крыніц
🚫 Полная перепечатка текста и фотографий запрещена.
⚠️ Частичное цитирование разрешено при наличии гиперссылки.