Народны каляндар: што поле ўродзіць, жнівень знаходзіць
15 жніўня
Да гэтага часу ў лугах вырастала атава – «другое сена», таму дзень называўся Сцяпан-сенавал.
Была такая прыкмета: які Сцяпанаў дзень, такім будзе і верасень.
16 жніўня
Антон Віхравей. Дзень лічыўся пачаткам збору арэхаў.
Заўважылі: які Віхравей, такі і кастрычнік.
17 жніўня
Дзень называўся Аўдоцця Сенагнойка. З гэтага часу пачыналі ісці дажджы, шкодныя для сяўбы. На Аўдоццю прыбіралі апошнія цыбулю і агуркі.
Прыкмецілі: якое надвор’е 17 жніўня – такі і лістапад.
18 жніўня
Еўсцігней-жытнік. Замешвалі цеста на ячменную выпечку з першага намалоту. Для здаровых дамачадцаў пяклі нішчымныя жытнікі на алею, а для хворых – здобныя ячменныя жытнікі на сметанковым масле. У некаторых мясцінах у гэты дзень выконвалі паэтычны абрад загавору палёў.
Існавалі прыкметы: якое надвор’е 18 жніўня, такім і снежань чакаць; калі крыкнуць у чыстым полі на ўвесь голас, і рэха будзе далёка чуваць, то бліжэйшыя дні будуць сонечнымі, а калі рэха чуваць блізка, то пойдуць дажджы.
19 жніўня
Яблычны Спас, Другі Спас. Дзень лічылі святам садавіны, якую дазвалялася есці з гэтага дня: «Смачныя яблычкі на Спаса». Яблыкі абавязкова неслі на могілкі нябожчыкам. Людзі верылі, што 19 жніўня канчаецца лета: «Прыйшоў Спас – лета ад нас». Дзень адлёту буслоў. Калі птушкі не адляталі, то гэта было прыкметай мяккай і цёплай зімы.
Заўважылі: цёплы ясны дзень – будзе снежная зіма; ідуць дажджы – лістапад таксама дажджлівы будзе; калі шмат яблык урадзілася, то наступны год будзе ўраджайным.
20 жніўня
Дзень Пімена. З мёдам, яблыкамі і пірагамі людзі наведвалі хворых суседзяў, спяшаліся ў бальніцы і сірочыя прытулкі. Абавязкова трэба было пакінуць няшчасным і бяздольным пачастункі ды падарункі.
Былі такія прыкметы: калі буслы ўжо ўлятаюць у вырай – восень будзе ранняй і халоднай; калі на рацэ бачна пену – хутка пойдуць дажджы; вясёлка раніцай – да дажджлівага надвор’я.
21 жніўня
Мірон Ветрагон. «Вятры-ветрагоны пыл пагналі па белым свеце, заплакалі па леце».
Заўважылі: які Мірон Ветрагон, такі і студзень; калі дзень дажджлівы, то і восень такой будзе; шмат ягад у лесе – зіма будзе халоднай.
Падрыхтавала Алена Брыч
Фота з адкрытых крыніц
🚫 Полная перепечатка текста и фотографий запрещена.
⚠️ Частичное цитирование разрешено при наличии гиперссылки.