Народны каляндар: прыйшоў лістапад – кармі скацінку, брат
14 лістапада
Свята шаўцоў і кавалёў, свята дзявоцтва. Адзначалі таксама першую сустрэчу з зімой.
Заўважылі: калі дым з коміна падымаецца вертыкальна ўверх, няхай сабе і ў непагадзь, хутка надвор`е наладзіцца.
15 лістапада
Гэты дзень называлі Жытніцы: сяляне аглядалі свіраны, клеці і жытніцы, бо ад іх становішча залежала, ці добра зімой захаваецца ўраджай. Казалі так: «Жытніца поўная – дык і душа вольная».
16 лістапада
Дзяўчаты лічылі, што, калі ў гэты дзень вытканы кросны, тады і пра жаніха можна думаць. Але трэба было паставіць ткацкі станок без падказкі маці.
Рэкамендавалі па магчымасці пазбягаць людных месцаў, а таксама пераносілі на другі дзень доўгую дарогу і стараліся не сварыцца.
17 лістапада
Людзі казалі: «Ярома – сядзі ў доме», бо лічылі гэты дзень нешчаслівым. Нікуды не хадзілі без асаблівай патрэбы і не пачыналі ніякіх спраў. Казалі, што ў гэты дзень усе духі выходзяць на свабоду і спрабуюць пранікнуць у хату, каб узяць вугалю з печы. Таму не давалі нікому агню, нават калі за ім прыходзілі суседзі.
18 лістапада
Дзяўчаты варажылі на суджанага. Хлопцы, у сваю чаргу, запрашалі іх на гулянні, якія часам доўжыліся да самай раніцы. Спяшаліся нарыхтаваць на зіму чорную рэдзьку, бо яе выкарыстоўвалі пры лячэнні прастудных захворванняў.
19 лістапада
Звычайна ў гэты перыяд на рэчках з’яўляўся лёд, злучаліся берагі.
Лічылі: калі неба ўсю ноч чыстае, але вакол месяца з`явіліся вялікія кругі – будзе мароз; калі ж кругі гэтыя злёгку пачырванеюць – магчымы снегапад з ветрам.
20 лістапада
Нашы продкі ў гэты дзень прыкормлівалі каля сваіх хат зімовых птушак. Сяляне пачыналі хадзіць на зімовую рыбалку, бо лёд на рэках і азёрах да гэтага часу станавіўся ўжо трывалым.
Падрыхтавала Алена БРЫЧ
Фота з адкрытых крыніц
🚫 Полная перепечатка текста и фотографий запрещена.
⚠️ Частичное цитирование разрешено при наличии гиперссылки.