Народны каляндар: мароз у снежні і снег вышэй хаты – будзе год тады багаты
12 снежня
Парамон Зорнік. Выходзілі глядзець ранішнюю зару: барвовая – да сцюдзёных вятроў, чырвоная – быць дню яснаму, снежная – чакаць завеяў. Казалі, што ў гэты дзень «ходзіць зіма ў мядзведжым футры, па стрэхах стукае, бабам уставаць загадвае тапіць печ».
Былі такія прыкметы: калі на дварэ мала снегу, то хлеб урадзіцца слаба; калі снег глыбокі, то год будзе добры.
13 снежня
Дзень дзявочых святаў. Варажылі на бліны, крычалі ў калодзеж, бегалі пад вокны слухаць, пра што гавораць у хаце, каб зразумець, як складзецца іх лёс.
Старыя людзі хадзілі слухаць ваду ў студнях: «Ціхая вада – да добрай зімы, шумная – да сцюжы і завеяў».
14 снежня
Дзень Навума. Імкнуліся з гэтага дня вучыць дзяцей грамаце. Казалі, што «Навум наставіць на вум, розуму навучыць».
Заўважылі: калі на небе шмат зор – будзе завея; калі вецер дзьме з поўначы, то ў бліжэйшыя дні будзе вельмі халоднае надвор’е.
15 снежня
Дзень лічылі нешчаслівым, таму не пачыналі нічога важнага.
Прыкмецілі: калі шмат снегу, то будзе багаты сенакос налета; калі дзень непагодлівы, то падобнае надвор’е пратрымаецца да 30 студзеня.
16 снежня
Іван Маўчальнік. Словам у гэты дзень не злоўжывалі. Імкнуліся не толькі менш казаць, але і менш пісаць.
Лічылі: калі ідзе мокры снег і адразу растае, то ўраджай у новым годзе будзе кепскім.
17 снежня
Варварын дзень. Пастухі збіралі «варваршчыну» – традыцыйную плату за сваю працу. Жанчыны ў гэты дзень не пралі. Каб лепш пладзілася жывёла, у некаторых мясцінах ляпілі з цеста галовы, рогі, капыты, вушы і кармілі гэтым скаціну.
Цёплае надвор’е на Варвару прадказвала добры ўраджай ільну на лета.
18 снежня
Дзень Савы. Як і Варварын, лічыўся «бабскім». Не пралі, а таўклі проса, ячмень на куццю, малолі жыта. Казалі так: «Варвара мосціць, Сава цвікі вострыць, а Мікола прыбівае» – маючы на ўвазе паступовае нарастанне маразоў.
Прыкмецілі: калі з коміну ідзе дым уверх роўным слупам, то будзе мароз, а калі віецца ў розныя бакі, то будзе моцны вецер.
Падрыхтавала Алена Брыч
Фота з адкрытых крыніц
🚫 Полная перепечатка текста и фотографий запрещена.
⚠️ Частичное цитирование разрешено при наличии гиперссылки.