Народны каляндар: ліпень косіць і жне, доўга спаць не дае
4 ліпеня
У гэты дзень прынята займацца зборам кветак ліпы, з якіх рыхтавалі розныя адвары і зёлкі. Ліпавым адварам гаспадыні нават паілі жывёлу і хатнюю птушку – каб здаровымі былі і добра пладзіліся.
Лічылася, што ў ноч на 4 ліпеня сняцца прарочыя сны.
Былі такія прыкметы: ранішняя раса доўга не прасыхае – будзе навальніца; гром грыміць – непагода будзе працяглай.
5 ліпеня
У гэты дзень было прынята чысціць калодзежы, а таксама хадзіць у лес і вязаць венікі для лазні.
Людзі прыкмецілі: увечары гуляе месяц – да добрага ўраджаю.
6 ліпеня
Напярэдадні Купалля нашы продкі збіралі лячэбныя карэнні і травы. Нават старыя купаліся ў рэчках, мыліся і парыліся ў лазнях, ужываючы пры гэтым для вылечвання ад хвароб розныя духмяныя травы.
Лічылі неабходным пакупацца ў гэты дзень, каб прыдбаць здароўе і маладосць.
7 ліпеня
Працяг купальскага свята, якое доўжылася ўсю папярэднюю ноч. «Учора было Купалле, а сёння Ян…» – спяваецца ў народнай песні. У гэты дзень было прынята пачынаць сенажаць, пакуль трава не абсыпалася.
Людзі заўважылі: моцная раса на Яна – да ўраджаю агуркоў; калі ўмыцца купальскай расой і пакупацца ў рацэ – прыбавяцца здароўе і прыгажосць; травы, сабраныя ў гэты дзень, гаючыя; калі пераскочыць праз купальскае вогнішча, то ўсе беды і хваробы згараць.
8 ліпеня
Дзень Пятра і Хяўронні, дзень кахання.
Былі такія прыкметы: калі ў гэты дзень ідзе дождж, то будзе добры ўраджай мёду; свінні і мышы сена ядуць – да дрэннага пакосу.
9 ліпеня
У гэты дзень моладзь адпраўлялася ў лес па суніцы. Было такое павер’е: хто жадае пазычыць грошы, павінен пакласці траву суніцы ў кішэню і тады ўжо ісці па пазыку – адмовы не будзе.
Калі ў гэты дзень ідзе дождж, то лета да канца будзе дажджлівым; сонечны дзень прарочыць добрае надвор’е да самай восені.
10 ліпеня
Самсон-сенагной. Гэта значыла, што сена, якое скошана і нарыхтавана ў гэты дзень, прападзе.
Людзі прыкмецілі: калі на Самсона дождж, то да бабінага лета будзе мокра; лес без ветру шуміць – да дажджу.
Падрыхтавала Алена БРЫЧ.
Фота з адкрытых крыніц.