Пераможцам праекта Dream Dance Fest на «Славянскім базары ў Віцебску-2020» стаў заслужаны аматарскі калектыў Рэспублікі Беларусь эстрадна-спартыўнага танца «Дарлінг».
За выкананне кампазіцыі «BELIEVE ME» пінчане былі ўзнагароджаны Гран-пры. У віншавальным слове дырэктар «Славянскага базару» паабяцаў прыкласці максімум намаганняў, каб у наступным, юбілейным фестывалі «Дарлінг» змог прыняць удзел у яго адкрыцці альбо закрыцці.
Кіраўнік калектыву Вера Цімафеева рассказала, што аб фестывалі яны марылі даўно. Танцавальны праект Dream Dance Fest праходзіў у другі раз. Адбор для ўдзелу ў ім быў жорсткім. Так, у сёлеташнім сакавіку пінскія танцоры выступілі на Міжнародным шматжанравым фестывалі-конкурсе «Міленіум», у межах якога і адбыўся адборачны тур. У сувязі з эпідэміялагічнай сітуацыяй фінал праходзіў незвычайна — удзельнікі адпраўлялі відэазапісы сваіх нумароў. Для сапраўдных прафесіяналаў няма розніцы, у якім фармаце дэманстраваць свае навыкі. Такім чынам, усе пяць танцавальных кампазіцый, якія былі прадстаўлены на «Міленіуме», занялі першыя месцы. Там жа калектыў ганаравалі Гран-пры — журы ацэньвала не асобны танец, а ўсе нумары цалкам. Гэтыя перамогі прынеслі пуцёўку на «Славянскі базар у Віцебску». Даўняя мара здзяйснілася.
«Валошкі» знакамітага фестывалю не прычына рабіць перапынак. «Дарлінг» і зараз працуе на поўную катушку, рыхтуецца да новых канцэртаў. А яшчэ Вера Цімафеева падзялілася, што ў планах зладзіць сольнік на пінскай пешаходцы. І мы ўсе чакаем гэтага.
Танцоры толькі вярнуліся з конкурсу і ўжо зноў у справе — на гэтым тыдні яны «запалялі» на галоўнай пешаходнай вуліцы горада для гасцей — удзельнікаў маладзёжнага поезда «#Беларусь. Моладзь. Натхненне».
Ірына ДЗЕНІСОВІЧ
Фота аўтара