Усе, хто сочыць за навінамі народнага літаратурна-краязнаўчага музея Якуба Коласа, ведаюць пра нестандартнасць нашых экскурсій і мерапрыемстваў.
І на гэты раз на традыцыйных «Каласавінах», прысвечаных 120-годдзю прыезда настаўніка Канстанціна Міцкевіча (сапраўднае імя Якуба Коласа) на працу ў Пінкавічы, крэатыўнасць, па словах нашых гасцей, зашкальвала. А паспрыялі гэтаму наступныя абставіны: праз хвілін 20 ад пачатку свята знікла святло – шквалісты вецер парваў правады.
А зараз па парадку. Пры святле паспелі выступіць з «Полькай беларускай» нашы танцоры са «Сланечнікаў» і галасістыя юныя чухаўляне з гуртка «Каласок» са сваімі фальклорнымі нумарамі.
Дарэчы, для апошніх гэта была генеральная рэпетыцыя перад паездкай у Мінск – яны выйшлі на рэспубліканскі этап конкурсу «Нашчадкі традыцый». Якуб Колас, працуючы на д часткамі трылогіі «На ростанях» «У палескай глушы» і «У глыбі Палесся», якраз збіраў і запісваў фальклор. А гэты фрагмент нашага свята акурат з «Вячорак» тых далёкіх часоў.
Як толькі юныя таленты паднялі гасцям настрой, знікла святло. Але ж тэатральная трупа настаўнікаў з Жыдча не разгубілася і прапанавала праглядзець вершаванае апавяданне «За дождж» у іх выкананні з уключанымі на тэлефонах фанарыкамі. Гэта было нешта! Наўмысна не прыдумаеш! У поцемках, як на падмостках сапраўднага тэатра, спектакль прайшоў на біс. Напомнім, што гэта ўжо другое выступленне артыстаў-аматараў у нашым музеі.
Пра «распрацаванасць душы» на прыкладзе твораў Якуба Коласа распавядала ў сваім выступленні карэнная жыхарка Пінкавічаў, кандыдат філалагічных навук Вольга Козіч. Настаўнікі школ горада, якіх мы ўпершыню запрасілі на «Каласавіны», з цікавасцю слухалі лекцыю навукоўцы. Затым мы звязаліся па тэлефоне з настаўніцай Навадворскай базавай школы Алінай Рэбкавец, якая ўдзельнічала ў рэспубліканскіх «Каласавінах» і якраз рыхтавалася выступаць у Акінчыцах з прэм’ерай песні на словы Я. Коласа «Песняй вітаю я вас». Музыку, дарэчы, напісаў яе брат Віталь Нарывончык.
Не змог прапусціць наша свята і Віктар Мяцельскі – мастак, скульптар, кампазітар, бард. Ён выканаў песню на словы Якуба Коласа.
Член клуба літаратараў «Пінчукі» Людміла Шклёда прачытала верш, прысвечаны Коласу.
Кульмінацыяй свята стала выступленне мясцовай рэп-поп-зоркі, удзельніка праекта «Зорны шлях» на АНТ у камандзе Я. Алейніка Івана Дарашэнкі. Янка спяшаўся да нас з канцэрта ў каледжы мастацтваў, дзе ён зараз вучыцца на ІV курсе. Сапраўднаму таленту і без мікрафона ўдалося наладзіць кантакт з публікай. Уся аўдыторыя з запалам спявала «Не прадаецца хата бацькоў», «Сланечнікі». Іван прачытаў свой легендарны рэп пра Палессе.
А яшчэ да нас упершыню завіталі госці з Люсінскай школы з-пад Ганцавічаў. Менавіта адтуль пачалася настаўніцкая дзейнасць маладога Канстанціна Міцкевіча.
Кіраўнік школьнага музея цікава расказала пра жыццё ўстановы і запрасіла нас у госці. Спадзяемся, што гэта сустрэча перарасце ў моцнае сяброўства.
Па традыцыі, імяніны завяршыліся частаваннем – дзерунамі са смятанкай.
Усё было: і хлеб, і відовішча. А адсутнасць святла надала нашай літаратурнай святочнай тусоўцы рамантызму і асаблівага шарму. Дзякуй Богу, свята атрымалася!
Жанна Верыч,
метадыст цэнтра творчасці дзяцей і моладзі Пінскага раёна, рэжысёр і сцэнарыст музейных свят.