Шмат разоў і па-рознаму прамаўляў калісьці Бог
да айцоў нашых праз прарокаў,
у гэтыя апошнія дні прамовіў да нас праз Сына.
Габр 1, 1–2
Умілаваныя ў Хрысце браты і сёстры!
Дарагія вернікі, людзі добрай волі!
Святкаванне таямніцы Божага Нараджэння – гэта запрашэнне кожнага схіліцца перад вялікай праўдай пра міласэрнасць і любоў Бога да чалавека. Гэта пацвярджэнне веры ў тое, што нават ноч можа стаць светлай ад бляску Бэтлеемскай зоркі, якая абвяшчае надыход новага дня і здзяйсненне самых светлых спадзяванняў. А бедная стайня можа ператварыцца ў найпрыгажэйшы дом Святой Сям’і.
Няхай святло той святой ночы Нараджэння Божага Сына напоўніць усіх радасцю, надзеяй і супакоем, якія праменяцца з мацярынскага сэрца Найсвяцейшай Дзевы Марыі і бацькоўскага сэрца святога Юзафа. Няхай гэтыя святыя дні нагадаюць, што чалавечае жыццё, незалежна ад акалічнасцей, мае свой глыбокі сэнс і каштоўнасць, якія сягаюць у вечнасць. Просім Езуса Хрыста – абяцанага прарокамі Эмануэля – «Бога з намі», каб прынёс у кожны дом і кожнае людское сэрца духоўную радасць і суцяшэнне ад усведамлення таго, як моцна Бог узлюбіў чалавека. «Бо так палюбіў Бог свет, што аддаў Сына свайго Адзінароднага, каб кожны, хто верыць у Яго, не загінуў, але меў жыццё вечнае» (Ян 3, 16).
З нагоды ўрачыстасці Божага Нараджэння жадаю кожнаму і кожнай з вас здаровых і спакойных свят, спаўнення ўсіх найлепшых надзей, зразумення і падтрымкі ва ўсіх пачынаннях. Няхай Бэтлеемская зорка, якая абвясціла Нараджэнне Езуса Хрыста, нястомна ззяе на небасхіле вашага жыцця не толькі ў перыяд калядных свят, але і на працягу ўсяго новага года.
Хрыстус нарадзіўся! Славім Яго!
Антоні Дзям’янка,
біскуп Пінскі.
Пінск, Божае Нараджэнне, 2023 г.
