«І пайшлі яны, спяшаючыся,
і знайшлі Марыю, і Юзафа,
і Немаўля, якое ляжала
ў яслях» (Лк 2, 16)
Умілаваныя ў Хрысце браты і сёстры, дарагія вернікі і людзі добрай волі!
З нагоды надыходзячых урачыстасцей Божага Нараджэння звяртаюся да вас са словамі калядных віншаванняў.
Святочныя дні Божага Нараджэння з’яўляюцца для ўсіх нас радаснай магчымасцю яшчэ раз заглыбіцца ў таямніцу прыходу ў гэты свет Божага Сына, перажыць асаблівую атмасферу сустрэчы з Нованароджаным Хрыстом, Яго Найсвяцейшай Маці і Святым Юзафам, а таксама з усімі тымі, хто вітаў на зямлі Слова, якое сталася Целам (гл. Ян 1,14).
Сёлетнія святы Божага Нараджэння ў нашым рэгіёне мы перажываем у духу падрыхтоўкі да радаснага юбілею – 100-й гадавіны заснавання Папам Піем ХІ Пінскай дыяцэзіі, які будзем адзначаць у 2025 годзе. Хочам гэты новы літургічны перыяд перажыць як Год хрысціянскай надзеі, молячыся за шчаслівую будучыню для ўсіх нас.
Схіляючыся перад таямніцай Божага Нараджэння, жадаю непаўторнай цеплыні сямейнай атмасферы калядных святаў. Няхай Нованароджаны Збавіцель свету напоўніць кожны дом і кожнае сэрца верай, надзеяй і любоўю. Усім вам моцнага духоўнага і фізічнага здароўя, Божай апекі ў кожнай справе, спакойных, благаслаўлёных калядных святаў і шчаслівага Новага года.
Хрыстус Нарадзіўся! Славім Яго!
+ Антоні ДЗЯМ’ЯНКА,
біскуп Пінскі.
Пінск, Божае Нараджэнне, 2022.
Фота Вячаслава ІЛЬЯНКОВА.