На днях у сярэдняй школе №10 прайшла ўрачыстая прысяга навучэнцаў ваенна-патрыятычнага класа. Да таго ж гэта першы ў Пінску клас з пагранічнай накіраваннасцю.
Для дваццаці вучняў 10 «А» класа гэта быў важны і хвалюючы момант. Прымалі прысягу ў школьнікаў начальнік Пінскага пагранічнага атрада Максім Віктаравіч Бутранец і старшыня ветэранскай арганізацыі пагранатрада Анатоль Мікалаевіч Ксёндзык. Новаспечаным «ваенным» былі ўручаны пасведчанні віцэ-курсантаў, пагоны малодшых сяржантаў для двух камандзіраў аддзяленняў і зялёныя фуражкі – адметны знак для пагранічнікаў.
Акрамя таго, прывітаць дзесяцікласнікаў прыйшлі намеснік начальніка аддзела адукацыі па спорту і турызму гарвыканкама Людміла Сцяпанаўна Былінская і начальнік аддзела прызыву гарадскога аб’яднанага ваеннага камісарыята Аляксандр Валянцінавіч Герасіменка. Віцэ-курсантам пажадалі быць прыкладнымі вучнямі, сапраўднымі сябрамі, абачлівымі спагадлівымі да чужой бяды, годнымі і вернымі абаронцамі Айчыны.
Прыняць рашэнне вучыцца ў ваенна-патрыятычным класе – гэта значыць праявіць жаданне ў будучым папоўніць рады Інстытута пагранічнай службы, ваенных факультэтаў ВНУ, каб затым у званні лейтэнантаў стаць пад сцягі органаў пагранічнай службы.
Пажадаем віцэ-курсантам здзяйснення жаданняў у атрыманні афіцэрскіх пагонаў.
Ірына ДЗЕНІСОВІЧ
Фота Ганны Вярэніч