Сёлета Ларыса Вітальеўна Падапры-Гара сабрала зайздросны ўраджай цыбулі – вага асобнай цыбуліны даходзіць амаль да кілаграма. Гаспадыня вырошчшала гародніну з насення Эксібішэн. Ніякімі хімікатамі, каб паскорыць рост ці з’яўленне завязі на раслінах, не карысталася. “Само вырасла”, – гаворыць Ларыса Вітальеўна.
Цыбулю гаспадыня вырошчвае ў весцы Вялікія Дзіковічы, дзе мае ўчастак і гарод у 6-8 сотак. Такі вялікі ўраджай сабірае ўжо другі год запар – цыбуля тут родзіць небывалая. Самая вялікая важыць 936 г. “І на смак яна не такая вострая, як тая, што расце меншай па памерах і вазе, – паведаміла Ларыса Вітальеўна. – Да таго ж, на маім участку летась вырас гарбуз, які быў мне амаль што па пояс”.
Пакуль мы распытвалі спадарыню Падапры-Гара аб яе ўменні так шчыра “сябраваць” з гароднінай, і суседзі, і знаёмыя здзіўляліся і захапляліся ад аднаго толькі знешняга выгляду веліканак-цыбулін.
Ірына ДЗЕНІСОВІЧ
Фота Ганны ВЯРЭНIЧ