У сценах дзіцячай школы мастацтваў з аншлагам прайшоў канцэрт піяніста з сусветным імем, уладальніка прэстыжных прэмій міжнародных конкурсаў Кірыла Кедука, які актыўна вандруе па Еўропе з канцэртным турам. Праўда, і аб малой радзіме маэстра не забывае.
Дасягненні таленавітага маладога чалавека можна пералічваць бясконца, вось толькі некаторыя з іх: у 2009 годзе заваяваў I прэмію і прыз глядацкіх сімпатый на Міжнародным конкурсе Klavier Olymp у Германіі, апынуўшыся адзіным пераможцам у гісторыі конкурсу, які выйграў абедзве ўзнагароды адначасна. У 2013 г. піяніст запісаў свой дэбютны альбом My Polish Diary, выдадзены амерыканскай студыяй гуказапісу DELOS. У дадатак Кірыл з’яўляецца стваральнікам міжнароднага музычнага фэсту TyzenHouse, у якім бяруць удзел вядомыя артысты і музыканты. Кірыл Кедук з’яўляецца стыпендыятам прэмii Прэзідэнта Рэспублікі Беларусь, двойчы – стыпендыатам прэмii мэрыі г. Гданьска.
ЗША, краіны Еўропы, Паўднёвай Амерыкі, Японія – геаграфія выступаў піяніста вельмі шырокая. Таму канцэрт Кірыла Кедука – гэта адметная з’ява для горада над Пінай. На мерапрыемстве прагучалі творы вядомых класікаў, самым любімым з якіх для маэстра з’яўляецца Роберт Шуман. На канцэрце сабраліся сапраўдныя знаўцы музыкі. Цішыня была такая, што здаралася, быццам людзі утрымлівалі дыханне. Пінчукі з задавальненнем назіралі за кожным гукам прылады, за кожным пасажам таленавітага майстара. Кірыл ад душы іграў, укладаючы ў выкананне усё сваё гарачае сэрца. Ён адзначыў, што кожнага піяніста адрознівае яго асабісты стыль выканання. А канцэрт К. Кедука знайшоў водгук у сэрцах слухачоў, напоўніў душы аматараў музыкі новымі эмоцыямі.
Наталля ЛЯШКЕВІЧ