Узорны ансамбль танца «Гарэзлівыя шляхцюкі» Пінскага коледжа мастацтваў павярнуўся з наградамі з II фестывалю харэаграфічнага мастацтва «Dance Academy», які прайшоў у Рэспубліканскім палацы культуры прафсаюзаў.
У ім прымалі ўдзел каля 400 юных танцораў з розных гарадоў нашай рэспублікі. Яны выступалі ў розных намінацыях — танцавальнае шоу, народны танец, стылізацыя народнага танца, эстрадны, усходні, бальны і вулічны танец.
Пінскі калектыў на фестывалі быў прадстаўлены двума саставамі ў розных узроставых катэгорыях — 6-9 і 14-16 гадоў.
Яны прадставілі на суд журы дзве харэаграфічныя пастаноўкі — «Месцячковая кадрыля» і «Гарэзлівыя выкрунтасы». Па выніках конкурса старэйшая група «Гарэзлівых шляхцюкоў» заняла першае месца ў намінацыі «народны танец», у гэтай жа намінацыі малодшая група атрымала дыплом другой ступені.
«З «Месцячковай кадрыляй» мы ўдзельнічаем ужо не ў першым конкурсе, яе танцавалі, напрыклад, на «Сожскім карагодзе», а вось «Гарэзлівыя выкрунтасы» — новая пастаноўка, якую стварыла выкладчык нашага коледжа Надзея Мядзведзева. Нам вельмі прыемна, што гэты нумар атрымаў такую высокую ацэнку журы конкурса. А для малодшых выхаванцаў гэта ўвогуле першы конкурс, яны займаюцца у нашым ансамблі толькі год. Таму мы вельмі задаволеныя другім месцам», — адзначаюць кіраўнікі ўзорнага ансамбля танца Н.У. Лазіцкая і Г.У. Некрашэвіч.
Ансамбль плануе набор новых удзельнікаў у групы, аб’наўленне рэпертуара, а таксама часцей прымаць удзел у разнастайных конкурсах і фестывалях.
«Вельмі хочацца, каб да нас прыйшло больш хлопчыкаў. Нам не хапае мужскога саставу. Таму запрашаем новых удзельнікаў у наш калектыў», — падзяліліся Наталля Уладзіміраўна і Ганна Уладзіміраўна.
Ганна ІЛЬЯШЭВІЧ
Фота Ганны ВЯРЭНIЧ