Пад эгідай Года культуры і да 68-годдзя з дня нараджэння Яўгеніі Янішчыц у раённай бібліятэцы, што носіць імя паэтэсы, правялі прэзентацыю кнігі «Яўгенія Янішчыц: творы, жыццяпіс, каментарыі». Яна выйдзе ў чатырох тамах і будзе змяшчаць усю бібліяграфію паэткі.
Каб прэзентаваць кнігу, прыехала сяброўка і аднакурсніца Я.Янішчыц, укладальніца зборніка Тамара Аўсяннікава. Разам з Т.Аўсяннікавай выданне да друку рыхтавала старэйшы навуковы супрацоўнік Цэнтра даследаванняў беларускай культуры, мовы і літаратуры, кандыдат філалагічных навук, дацэнт Святлана Калядка. Гэты праект падтрымаў сын паэтэсы Андрэй Сяргеевіч, які разам з жонкай і дачкой прыехаў на малую радзіму маці, каб прэзентаваць зборнік.
Першы том складаецца з вершаў Яўгеніі Янішчыц, прыжыццёва апублікаваных у шасці паэтычных зборніках і кнізе выбранай паэзіі. Упершыню вершы надрукаваны з літаратуразнаўчымі і навуковымі каментарыямі да іх. У першы том увайшлі паэтычныя зборнікі «Снежныя грамніцы», «Дзень вечаровы», «Ясельда», «На беразе пляча» і «Пара любові і жалю».
Падчас прэзентацыі было выказана шмат цёплых слоў, а таксама слоў падзякі людзям, якія ажыццяўлялі гэты праект: родным, сябрам, суседзям і настаўнікам. Сярод іх дырэктар Літаратурнага музея Яўгеніі Янішчыц, настаўніца Антаніна Сідарук, якая прадставіла копіі вершаў вучаніцы Жэні.
Ды чаму ж паэзія Яўгеніі Янішчыц да гэтага часу не страціла актуальнасці і цікавасці? Меладычная жывая мова? Тэмы, што кранаюць патаемныя закуточкі душы? Вырашае чытач, кожнаму сваё…
Ірына ДЗЕНІСОВІЧ
Фото В. ІЛЬЯНКОВА